قريب جداً المدونه هتتقفل عشان المدونه الجديده ان شاء الله اللي هاحاول فيها الاهتمام باحداث الشعر ومشاكلنا معاه اكتر من القصايد اللي تقريباً معظمنا حافظها لمعظمنا
المدونه الجديده بدأتها بموضوع مهم في العاميه يتعلق بلغة التلقي اتمني التواصل بعد تحديث المدونه وزيادة الحضور

http://3mr7assan.blogspot.com/
المدونه يتم تحديثها وتعديلها يومياً
عمرو حسن

منتدي جديد

موقع جديد شامل
نتمني التواصل والمشاركة
http://www.elmasrawyia.com/

مشاهد من عبقرية الضل

أفتكر كل اللي يعرفوني أو متابعيني سمعوا النص ده بس انا أول مره انشره , ياريت اشوف آراء لو فيه

وانا هاعرض أول ضل بس دلوقتي

"مشهد واحد _ ضل الأشياء"

باملُك ضل خاص
أوقات بيرفض كل حركاتي ويعمل عكسها
مثلاً:
وانا بقطف الوردة اللي لفتت نظري ف الشارع
خرج عن طوعي ورفض يقطفها
ولما رميتها بطول دراعي ف النهر
كان اللي ينسلِت مني
ويروحلها علشان يشوفها

آمنت بالأسطورة دلوقتي
حكايات غريبه سمعتها عن حياة الضل
مثلاّ :
عن ضل عفش جيراننا وقت ماعزّلوا
رفض يسيب البيت ويسكن بيت جديد
عن ضل صاج الكحك عند المحتاجين
إزاي بيلمس إيديهم يضحكوا عيد
حكايات كتيره سمعتهاعن بيوت مات صحابها
ولسه الضل عايش فيها حتي الآن
بيبُص في المراية ويرد ع التليفون
يفتح الباب ويخرج للشوارع

حكولي عن ضل الكمنجاتي اللي مات مقتول
إزاي بيعزف لحد نص الليل
بنفس أسلوب صديقه
مؤلم وفذ
إسألوا البلكونات
عن صحابها اللي ماتوا من سنين
ولسه كرسيهم الهزّاز
مابطّلش هز

قالوا :
(الباب لو زعل
بيقفل لوحده وبيخنق الترباس
بيقتل كل تفاصيله ف حركة واحدة)

قلت :
(ضل الباب هو خوفنا القديم م الرجوع بعد واحده)

قالوا :
الألم والقلم
الألم ضل صاحبه
والقلم بيضّل صاحبه
كل مايملّكه أشياء
يوعده بحاجات جديده

قلت :
(الضل الحقيقي للقلم قصيده)

البرنامج ينظمه صندوق التنمية الثقافية
كتبت سارة سند



يستضيف مركز "طلعت حرب الثقافى" ندوة تحت عنوان "أدباء من بلدنا" فى السابعة مساء السبت المقبل، وذلك فى إطار برنامج "واحة إبداع الشباب" الذى ينظمه صندوق التنمية الثقافية برئاسة المهندس محمد أبو سعدة. تستضيف الندوة عدداً من أدباء الأقاليم وهم: الشاعر عمرو حسن والشاعر إبراهيم سعيد والقاصة سمر جبر، وذلك لإلقاء الضوء على إبداعاتهم الأدبية، ويدير الندوة د.حسام عقل.وفى إطار الرحلات الأسبوعية التى ينظمها مركز "طلعت حرب الثقافى" الأحد من كل أسبوع بهدف التعرف على معالم مصر التاريخية، ينظم المركز فى العاشرة صباح الأحد المقبل رحلة إلى مجمع الأديان

- موقع اليوم السابع -

وسط البلد " من جروبّي للمطر"

الصُبح
طلّعِت الشمس م البُك البلاستيك
وضحكِت

وسط البلد
لقطه واضحه في اتجاه الناس
لحظه
مابين تكشيره زادت , وضحكه قلِّت
سنتين بشوفها بتبُص ع الفستان
لاهيّ مشيت ولا الباترينه ملِّت
كل اللي حاصل
إنها لما تفتح بُكها البلاستيك
تصطدم بالواقع فتنتهي الروايه
بعضهم
إعتبر وجودها إشغال طريق
صاحب المحل
إعتبر وجودها دعايه
إعتبرها مانيكان بشر
باترينه تانيه بس في الشارع
بتخرّج الناس م الروتين
وتفتح عنيهم علي ذوق أوروبي

أشهد
بإن هذي الفتاه
تُشبه تعامُد الحلوي علي إزاز جروبي

من بلكونه عاليه
بيبان الميدان مصلوب
أربع مفارق للقمر
يقلع عبايته الشتا قبل استقالته
تستسلم الشمس المريضه للندى
البرد
يرسم ضحكته علي ياقة البالطو

هنا اللاطبيعي الطبيعي
بارفان باريسي ف ياقه زرقا
وكلونيا من أرخص عطور البياعين
اللي رايح حفلة "البولشوي" تمانيه ونص
واللي فضّل كيس فيشار وضمة بنت
هنا
نشيد العرقسوس للعطشانين
والفودكا اللي فضلت ف حضن الخواجه

آخر سِنت
هنا الخروج م الوقت
ديسمبر بيبُص من خَرم السنه ع السنا
ماوجدش ضوء , فحزِنت

في الميدان
لُب التجربه
ملح اللي حبّوا الملح في الذكرى
في الميدان كان الفقير
سارق جناح الوهم من ريش السما
حلمان يطير
باترينه خالطه المشتري بالمُشترا
فكإن الفطاطري
بيقدِّم الناس للفطير

في الميدان العابرين
البياعين , الشنط الحريمي والأغاني العاطفيه
مشهد متابعة واد من الشارع لشعر الأجنبيه
يتهز لما تمُر ع الناصيه
يهتز قلبه
زي اختناق سمكه شقيه ف كيس
أرستُقراطي من حضن الشمال
وجنوبي بائس
إتشاركوا نفس الكرسي في الأتوبيس
هنا المكان الوحيد ع الأرض
اللي مش ممكن تميز فيه
العاصي م القديس

هنا احتفال البنت بالفستان
وقفِت تواصل نظرة الحرمان
فلا فشلِت ولا نِجحِت
الصُبح
طلّعِت الشمس م البُك البلاستيك
وضحكِت